Brigade Loco-ren Bide baten esanahia: punkaren heldutasuna Bergaratik
Brigade Loco taldeak disko berria kaleratu du: Bide baten esanahia (2025). Bergaran sortutako punk rock taldea 2017tik hona euskal eszenako energia handienetakoa bihurtu da, eta lan honek urrats sendoa ematen du heldutasunerantz. 10 kantu berri eta Jonny Gerriwelten “Keep the flame alive” abestiaren bertsioa jasotzen ditu albumak, binilo beltzean eta eco blue edizioan eskuragarri.
Lander (ahotsa), Alex eta Martin (gitarraak), Oier (baxua) eta Manex (bateria) osatzen dute taldea. Hasieratik publikoarekin konektatzeko gaitasuna erakutsi zuten, batez ere “Bultzada” singlearekin, Real Sociedadeko zaleentzat ereserki bihurtu zena. Covid garaian aurkeztu ezinik geratu zen bigarren lanaren ondoren, disko honek sendotzea dakar, Euskal Herritik harago begira.
Sound of Sirens estudioan grabatu dute berriz ere, Julen Urzaizekin, eta Miguel Peralek ekoitzi du. Soinuak bere horretan mantentzen du punkaren indarra, baina letrak introspektiboagoak dira. Diskoa “Eten” kantuarekin hasten da, adiskidetasunari eta egindako bideari buruzko istorioarekin.
Proiektu berezi bat ere badakar: “Agur”, “Ateak itxi dira” eta “Barneko disdira” kantuekin egindako bideoklipen trilogia, Beñat Goiaren zuzendaritzapean. Gazte baten bizitzako etapak kontatzen dituen film moduko bat da.
Bide baten esanahia gordina, zuzena eta emozioz betea da. Punkak eman dezakeen guztia dauka: indarra, amorrua, egia eta gitarra zorrotzak. Brigade Loco jada ez da sekretua: errealitate sendoa da.
